(المسحراتي) ح 25،،،بقلم،،، مصطفى فريد

الحلقة   ( الخامسة والعشرون  ) من المسحراتي  
من ديوان / ولسه الفؤاد عطشان 
للشاعر مصطفى فريد       (. ٢٥ )

تتر ٠٠٠

مسحراتى داير أنادى
فى كل وادى اقول ياهادى
أحرس ولادى وانصر بلادى
على الاعادى والطماعين

نبضى فى قلبى بيدق طبلى
زى اللى قابلى جادل فى حبلى
بحرى وقبلى نجوم بتضوى
بهجة وحنين

نقلة ٠٠

يامسلمين امدحوا.
سيدنا النبى العدنان. 
وحيوا ذكرى إللى راحوا.
شهدا من الأوطان
فى ثورة الميادين.

حسب الميعاد يا شهيد.
ح نقيم لك الافراح.
ومستحيل ننعيك. 
ولا يوم ح تبقى نواح.
مهما فاتتنا سنين.

جسدك صبح فانى. 
وإيه فايدة الأجساد.
مادام الروح ربيع باقى.
واجسادنا ح تبقى رماد.
وترجع تانى أصل الطين

فيناله ٠٠

بانادى دايما الله ربى وهادى قلبى
فى كل وقت وكل حين

ادعى لربك يغفر لذنبك
ويخف جرحك ويعم فرحك
وتروق ملامحك
ويمد لينا شهره الكريم